Lakror me Qepe e Domate

Karakteristike për zonën Juglindore të Shqipërisë. Ndërsa kjo recetë vjen nga fshati Voskopojë. I pjekur në saç, shija e lakrorit është e mrekullueshme.

Përbërësit:

800 gr miell
2-3 lugë vaj ulliri
gjalpë
kripë
400 ml ujë
1 kg domate (të prera në kubikë)
2 kokrra qepë

Përgatitja:

Për mbushjen: Skuqim qepën në vaj, në zjarr të mesëm deri sa të zbutet.

Shtojmë domaten dhe e gatuajmë për rreth 30 minuta në zjarr të ulët. Gjatë gatimit mund të jetë nevoja të shtojmë pak ujë.

Për petat: Zëmë brumin me ujë të vakët dhe pak kripë. E punojmë mirë, e lëmë të rrijë pak dhe e ndajmë në dy copa. Copa për petën e sipërme duhet të jetë 450 gr. kurse e poshtmja 440 gr.

Tërhollim petën dhe e shtrojmë në një tepsi të lyer me vaj. Hedhim mbi të mbushjen dhe e mbulojmë me petën tjetër. E spërkasim me pak gjalpë.

Mbulojmë saçin me prush dhe e vëmë mbi zjarr që të nxehet mirë.

Vëmë saçin mbi tepsinë e lakrorit dhe e lëmë për rreth 1 minutë. Heqim saçin, e vëmë tepsinë mbi zjarr dhe e mbulojmë përsëri me saç.

E pjekim për rreth 10 minuta duke e zbuluar dhe kontrolluar disa herë gjatë pjekjes. Në gjysmë të pjekjes e mbulojmë lakrorin me letër alumini.